Գրքեր

Աստված անըմբռնելի է

Քրիստոսի ծնունդից շատ առաջ Սիցիլիայում մի տիրակալ կար՝ Հիերոն անունով: Նա իմաստուններ ուներ իր պալատում, որոնց մեջ Սիմոնիդն էր առանձնանում:

Մի անգամ Հիերոնն ասաց նրան.

- Սիմոնի՛դ: Լարի՛ր ողջ իմաստությունդ և բացատրիր ինձ, թե ինչ է Աստված:

- Դժվար հարց ես ինձ առաջարկում, իմ տիրակալ,- պատասխանեց իմաստունը,- թույլ տուր մեկ-երկու օր մտածել:

- Լավ,- համաձայնեց Հիերոնը:

Անցավ երկու օր: Սիմոնիդն արքայի մոտ եկավ և պատասխանելու փոխարեն ևս չորս օր խնդրեց:

Չորս օրն էլ անցավ, իսկ Սիմոնիդը կրկին ժամանակ խնդրեց:

- Արքա՛, ևս ութ օր շնորհիր:

Հիերոնը խոժոռվեց.

- Կատակում ես, Սիմոնիդ: Այսպես որ գնա, շուտով տասնվեց օր կխնդրես մտածելու համար, հետո՝ երեսուներկու: Վերջապես ե՞րբ ես ինձ վերջնական պատասխան տալու:

- Կռահեցիր, տիրակալ,- հանգիստ ասաց Սիմոնիդը,- երբ ութ օրն անցներ, ես տասնվեցն էի խնդրելու, որ մտածեմ, հետո՝ երեսուներկուսը, այնուհետև՝ վաթսունչորսը և այդպես ժամկետն անվերջ կրկնապատկելու էի: Իսկ ինչ վերաբերվում է պատասխանին, ապա ինձ թվում է, որ արդեն տվել եմ քեզ:

- Ինչպե՞ս թե,- զարմացավ Հիերոնը,- Դու ինձ դեռևս ոչինչ չես ասել Աստծո մասին, այլ անընդհատ ժամանակ ես խնդրել:

- Հենց դա էլ իմ պատասխանն է,- ասաց իմաստունը,- Տեր իմ, ոչ ոք ի զորու չէ պատասխանելու քո հարցին: Որքան ավելի շատ ես դրա մասին մտածում, այնքան ավելի քիչ ես հասկանում և ստիպված ես նորանոր ժամկետներ խնդրել: Այդ հարցը սարի պես է: Հեռվից նայելիս այն հսկայական է թվում, իսկ որքան ավելի ես մոտենում այն այնքան ավելի է բարձրանում ու աճում, և դու նրա առջև քեզ այնքան փոքր, խեղճ ու ոչնչություն ես զգում: Եվ եթե սարը չես կարող ձեռքերիդ մեջն առնել ու ծածկել ափով, ապա ինչպե՞ս ես կամենում ուղեղով ընդգրկել նրան, ով և՛ սարն է ստեղծել և՛ մարդուն:

Հիերոնը հասկացավ Սիմոնիդի խոսքերը, աչքերը երկյուղածությամբ երկինք հառեց ու շշնջաց.

- Այո՛: Աստված անըմբռնելի է:

 

Ռուսերենից թարգմանությունը՝ Էմիլիա Ապիցարյանի

23.11.20
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․