«Աստվածածնի ոտքերի տակ լուսնի մահիկը» պատկերը

Այս պատկերը խորհրդանշում և արտահայտում է Սուրբ Կույսի անարատ հղությունը (Ղուկաս 1:26-38): Կանանց հղությունը կապված է լուսնային ամիսների հետ, սակայն Աստվածածնի հղությունը բնական չէր, ինչպես սովորաբար բոլոր կանանց մոտ: Սուրբ Կույսի հղությունը գերբնական էր և վեր էր այդ օրինաչափությունից, հետևաբար Աստվածածինը հաղթահարել էր լուսնային ամիսների հետ կապված օրինաչափությունը: Ահա այս գաղափարը արտահայտված է Աստվածածնի ոտքերի տակ պատկերված լուսնի մահիկի խորհրդով:

Քրիստոնեական եկեղեցու աստվածաբանությունը մշակել է Սուրբ Կույսի վարդապետությունը (Մարիամաբանությունը), որտեղ աստվածաբանական լույսի տակ մեկնաբանվում է Ս. Կույսի անարատ հղությունը և Աստծո որդու մարդացումը: Լուսնի մահիկի շուրջը պատկերվում է գալարվող օձ: Առաջին մարդը մեղանչեց կնոջից խաբվելով, որին գայթակղել էր չարը՝ սատանան՝ օձի կերպարանքով: Մարդկային մեղքի պատճառը դարձավ կինը, սակայն փրկագործությունը նույնպես կնոջ միջոցով եղավ: Աստված մարդացավ կնոջ` Սուրբ Կույսի միջոցով: Եթե աստվածաբանության մեջ Քրիստոս անվանվում է երկրորդ Ադամ, որ ախտազերծեց ադամական առաջին մեղքը, ապա Աստվածամայրը կապվում է Եվայի՝ մեղսագործությունը կատարող կերպարի հետ, միայն թե որպես «նոր Եվա»՝ Փրկչի մայր, ով պատճառ եղավ աստվածային ծրագրի փրկագործությանը:

Կազմեց Գայանե Սուգիկյանը