Գրքեր

Այցելություն վիրավոր զինվորների ընտանիքներին

Վարդանանց և այլ հերոսամարտեր կերտած հայի հերոսական ոգին այսօր էլ շարունակում է ապրել: Այդ ոգով ներշնչված մեր քաջարի զինվորները Հայոց նոր գոյապայքարում, թշնամու դեմ համառ դիմադրություն ցույց տալով, խիզախորեն մարտնչեցին՝ պաշտպանելով հայրենիքն ու ազատ ապրելու իրավունքը: Հայոց մեծ զորավար Գարեգին Նժդեհն ասել է. «Նա, ով ընդունում է Աստծու գոյությունը՝ ընդունում է նաև իր պարտականությունը հանդեպ գերագույն իրականությունների՝ ազգի, հայրենիքի և պետության»: Հայրենիքի շենացման սրբազան գործին լծված յուրաքանչյուր հայորդի պարտք ու պատասխանատվություն ունի ոչ միայն հայրենիքի, այլ նաև՝ հայրենյաց պաշտպան՝ հայ զինվորի հանդեպ:

Երախտագիտության, պարտքի ու պատասխանատվության զգացումն էր, որ կյանքի կոչեց Զորավոր Ս. Աստվածածին եկեղեցու սոցիալական ծրագրերից հերթականը: Սոցիալական ծրագրերի մշտական աջակից, ամերիկաբնակ Կարեն Վարդանյանի աջակցությամբ՝ Զորավոր Ս. Աստվածածին եկեղեցու հոգևոր հովիվ Տեր Գրիգոր քահանա Գրիգորյանը դեկտեմբերի 23-ին այցելեց Արմավիրի մարզում բնակվող, պատերազմի ժամանակ վիրավորում ստացած չորս ժամկետային զինծառայողների ընտանիքներին՝ որպես երախտագիտություն նրանցից յուրաքանչյուրին հանձնելով երեք կուբամետր վառելափայտ և դրամական աջակցություն: Տեր Հայրը նախ այցելեց զինծառայող Շմավոն Մուրադյանի (20 տ.) ընտանիքին, որ բնակվում է Արմավիրի մարզի Նոր Արտագերս գյուղի 1-ին փ., 2-րդ նրբ., 6 տ. հասցեում, ապա Լեռնամերձ գյուղում բնակվող Սուրեն Թեջոնայի (20 տ.) և Նարեկ (18 տ.) ու Գրիշա (20 տ.) Սաֆարյանների ընտանիքիներին, որ բնակվում են գյուղի 8-րդ տ. և 44-րդ տ. հասցեներում: Զինծառայողներից միայն Սուրեն Թեջոյանն է, որ ապաքինվել է և անցել զինծառայության, իսկ մյուս զինծառայողները դեռ բուժման մեջ են: Տեր Հայրն իր երախտագիտությունը հայտնեց հերոս զինվորների ընտանիքիներին՝ քաջարի ու հայրենասեր զավակներ դաստիարակելու համար և վիրավորներին մաղթեց շուտափույթ ապաքինում:

«Ժողովուրդն առանց հայրենասիրության նույնն է, ինչ մարմինն առանց հոգու: Հայրենիքներն ապրում են հայրենասիրությամբ ու կործանվում դրանց պակասից»,- ասել է հայրենանվեր ու հայրենասեր զորավար Գարեգին Նժդեհը: Նա, իր բացահայտած ճշմարտություններից մեկի համաձայն, հետևյալ հարցն է հնչեցրել և պատասխանել՝ ուզո՞ւմ ես գուշակել, տեսնել մեր ժողովրդի ապագան՝ նայիր նրա երիտասարդությանը… Հայրենապաշտական դաստիարակություն՝ ահա մեր «փրկության խարիսխը»:

 

Կարինե Սուգիկյան

 

23.12.20
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․