«Բարին երբեք չի մահանում»

Տիրոջ կամքն է, որ յուրաքանչյուր ոք հարատևի բարի գործերի մեջ: Ս. Հովհան Ոսկեբերանն ասել է, եթե մենք նախաձեռնեինք շրջագայություն արքայական մայրաքաղաքով և նրա մեծ մասն անցնելով՝ հանկարծ ծուլանայինք և կանգ առնեինք, չվերջացնելով ուղին, ապա այդպիսի շրջագայությունն անօգուտ կլիներ մեզ համար: Այդպես և մարդը կոչված է բարին գործելու և պետք է դրա մեջ մնա, մինչև որ ավարտի բոլորը՝ արժանորեն քայլելով դեպի Նրան, ով կոչել է իրեն բարության: Անկասկած, մենք կոչված չենք մեկ բարի գործ անելու, այլ բոլորը: Նման նրան, որ ունենք հինգ զգայարաններ, և բոլորից պետք է օգտվենք պատշաճ կերպով, այդպես և պետք է կատարենք բոլոր առաքինությունները: Եթե որևէ մեկն այդպիսին է, բայց ողորմած չէ, կամ էլ ողորմած է և կաշառակեր, կամ էլ չի վերցնում ուրիշինը, բայց և իր ունեցածից էլ բաժին չի հանում, այդպիսի մեկի համար զուր է ամեն ինչ: Մեկ առաքինություն մեզ իրավունք չի տա համարձակորեն կանգնելու Քրիստոսի գահի առջև, դրա համար հարկավոր է շատ, բազմազան ու տարաբնույթ առաքինություններ, ավելի շուտ բոլոր առաքինությունները: Լսեք, թե ինչ ասաց Քրիստոս Իր առաքյալներին. «Գնացե՛ք, ուրեմն և սովորեցրե՛ք նրանց այն բոլոր պատվիրանները, որ տվեցի ձեզ» (Մատթեոս 28:19):

Բարու մեջ հարատևմանն է ուղղված Զորավոր Ս. Աստվածածին եկեղեցու համայնքային կյանքից ներս իրականացվող սոցիալական ծրագրերը, որի շրջանակներում, հունվարի 24-ին Զորավոր Ս. Աստվածածին եկեղեցում, հոգևոր հովիվ Տեր Գրիգոր քահանա Գրիգորյանը Զեյնալյան Հերմինեին (32 տ.) հանձնեց դրամական օգնություն (100 ԱՄՆ դոլար), որ տրամադրել էր ամերիկաբնակ Կարեն Վարդանյանը: Կարիքավոր բազմազավակ ընտանիքը վարձակալությամբ բնակվում է Արմավիրի մարզի Այգեկ գյուղի 7/5 հասցեում: Չորս անչափահաս երեխաների մայրը՝ Հերմինեն, նշեց, որ իր զավակներից Աշխատոյան Թամարան (7 տ.) ունի ԴՑՊ հիվանդություն, և երեխան այժմ բուժում է ստանում Գյումրիի «Երեխաների տուն» հաստատությունում, քանի որ ընտանիքն ի վիճակի չէ հոգալու երեխայի բուժման ծախսերը: «Ամուսինս միկրոինֆարկտ է տարել, ժամանակ առ ժամանակ է կարողանում աշխատել, իսկ ընտանեկան նպաստի գումարով հնարավոր չէ ապրել: Ուրախ եմ, որ եկեղեցին մեր կողքին է և պատրաստակամորեն ու սիրով ձեռք մեկնեց նաև մեզ»,- ասաց Հերմինեն:

«Բարին երբեք չի մահանում, եթե մահանար՝ աշխարհում մարդիկ գոյություն չէին ունենա, ոչ մի տեղ կյանք չէր լինի: Իսկ աշխարհը լեցուն է մարդկանցով և հրաշալի կյանքով»,- ասել է Վիլյամ Սարոյանը:

Կարինե Սուգիկյան