Գրքեր

Ճանաչողական դաս Զորավոր Սուրբ Աստվածածին եկեղեցում

Ապրիլի 6-ին Երևանի թիվ 108 միջնակարգ դպրոցի 9-ի «Ա» դասարանի աշակերտները, հայ եկեղեցու պամության ուսուցչուհի Գայանե Գրիգորյանի նախաձեռնությամբ, այցելեցին Զորավոր Ս. Աստվածածին եկեղեցի: Այցը, ինչպես նշեց մանկավարժը, ճանաչողական նպատակ ուներ, որպեսզի աշակերտները եկեղեցում քահանայի բացատրությամբ ծանոթանային Հայ եկեղեցու ճարտարապետական կառուցվածքին, արարողությունների ժամանակ գործածվող աստվածապաշտական գրքերին, եկեղեցական սպասքին և հոգևորականի զգեստներին: Մինչ ճանաչողական դասը, աշակերտները, Տեր Վահան քահանա Առաքելյանի գլխավորությամբ, «Տերունական աղոթք»-ն ասացին: Տեր Հայրը աշակերտներին նախ ներկայացրեց, թե ճարտարապետական ինչպիսի հորինվածք ունեն հայկական եկեղեցիները, ինչ խորհուրդներ ունեն եկեղեցական շենքի տարբեր կերպերը՝ բազիլիկ, խաչաձև և բոլորաձև, և որոնք են եկեղեցիների պարտադիր տարրերը: Աշակերտները տեղեկացան, որ Երևանի հնագույն եկեղեցիներից Զորավոր Ս. Աստվածածինը եռանավ բազիլիկ եկեղեցի է, ունի գավիթ և եկեղեցուն կից գտնվում է Ս. Անանիա առաքյալի մատուռ-դամբարանը: Սրբապատկերների վերաբերյալ Տեր Հայրը նշեց, որ հայ եկեղեցին պատկերահարգ եկեղեցի է և ոչ պատկերապաշտ, և որ սրբապատկերն աստվածության որևէ մաս չի պարունակում, այլ նյութ է, որը հնարավորություն է տալիս «օրինակ» վերցնելու «նախատիպից» (Հիսուսից, Աստվածամորից կամ պատկերված որևէ սրբից):

Այնուհետև Տեր Վահանը Վաչագան սարկավագ Դոխոլյանի օգնությամբ աշակերտներին ներկայացրեց աստվածապաշտական գրքերը, եկեղեցական սպասքներն ու հոգևորականների զգեստները՝ նշելով նրանց գործածման ժամանակը, նպատակը և խորհուրդը:

Զորավոր Ս. Աստվածածին եկեղեցու կառուցման պատմությունից բացի աշակերտները ծանոթանացան նաև Ս. Անանիա առաքյալի վարքաբանությանը և այցելեցին առաքյալի մատուռ-դամբարան:

«Կարևոր է, որ ձեր սովորածը հիշեք և արժևորեք՝ որպես ազգային և հոգևոր ժառանգություն: Պահպանեք կյանքի գնով մեզ հասած եկեղեցու սրբությունները՝ Տիրոջ վարդապետության միջոցով դառնալով ճշմարիտ քրիստոնյա: Հավատով, Աստծո խոսքով ու Նրա ներկայությամբ ավելի հեշտությամբ կանցնեք ձեր կյանքի ընթացքը և որքան գեղեցիկ լինի ձեր ներքին «ես»-ը, այնքան գեղեցիկ կլինի ձեր արտաքին կյանքը»,- ասաց Տեր Վահանը և հորդորեց չմկրտված աշակերտներին մկրտվել՝ Հայ Առաքելական Սուրբ եկեղեցու լիարժեք զավակները դառնալու համար:

Ճանաչողական դասն իր բարի պտուղները տվեց. աշակերտների մոտ ցանկություն առաջացավ Ս. Պատարագի մասնակցելու և Հաղորդություն ստանալու: «Չենք մոռանա այս դասը, հետաքրքիր էր և տպավորիչ»,- ասացին 108 միջնակարգ դպրոցի 9-ի «Ա» դասարանի աշակերտները և իրենց խորին շնորհակալությունը հայտնեցին Տեր Վահանին՝ ճանաչողական և հագեցած դաս ունենալու կապակցությամբ:

 

Կարինե Սուգիկյան

06.04.18
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․