Գրքեր

Հոգևոր ճամփորդության ուրախությունը

Պահեցողության շրջանում քրիստոնյայի հոգու ամրությանն է ուղղված նաև հոգևոր ճամփորդությունը՝ ուխտագնացությունը: Հավատավոր անձի համար թանկագին մի պարգև է անցնել մի ճանապարհ, որ տանում է դեպի Աստծո տուն: Այդ լուսավոր ուղիներն աստիճանաբար մոտեցնում են անձին Աստծո ներկայությունը վայելելու կատարյալ ուրախությանն ու երջանկությանը:

«Ինձ ցույց տվիր կյանքի Քո ճանապարհները, Քո աջի քաղցրությունից ու վայելչությունից լիովին հագեցրիր ինձ երեսիդ ուրախությամբ»,- ասում է սաղմոսերգուն (Սաղմոս 15:11):

Այդ թանկագին պարգևն ու ուրախությունն իրենց հոգում՝ Զորավոր Սբ. Աստվածածին եկեղեցու համայնքը՝ հոգևոր հովիվ Տեր Գրիգոր քահանա Գրիգորյանի գլխավորությամբ, փետրվարի 27-ին երկար ճանապարհ անցավ՝ մեկնելով ուխտագնացության Օձունի Սբ. Աստվածածին եկեղեցի, Արդվիի Սբ. Հովհաննես վանք, լինելով նաև «Օձի պորտ» կոչվող աղբյուրի մոտ: Ուխտավայրերն ընտրվել էին օրվա սրբերի՝ Երուսաղեմի Սբ. Հովհան Հայրապետի, հայոց Սբ. Հովհաննես Օձնեցի Հայրապետի, Սբ. Հովհան Որոտնեցի և Սբ. Գրիգոր Տաթևացի վարդապետների հիշատակության համաձայն:

Վաղ առավոտյան ուխտավորներն իրենց ուղին սկսեցին «Տերունական աղոթք»-ով, ապա ընդհանրական աղոթքներից՝ Արևագալի ժամերգության սաղմոսների, շարականների, մաղթանքների, քարոզների և աղոթքների հնչմամբ շարունակեցին իրենց ճանապարհը՝ ծանոթանալով նաև օրվա հիշատակվող սրբերի վարքագրությանը: Հասնելով Օձունի Սբ. Աստվածածին եկեղեցի՝ ուխտավորները մասնակցեցին Ճաշու երեք ժամերգություններին, որ, սովորաբար, Մեծ պահքի շրջանում մինչ Սբ. Պատարագն են անցկացվում: Պատարագիչը՝ Օձունի Սբ. Աստվածածին եկեղեցու հոգևոր հովիվ Տեր Վրթանես քահանա Բաղալյանն իր շնորհակալությունը հայտնեց ուխտավորներին, որ աղոթակից եղան իրենց այս սուրբ կամարների ներքո: Ապա անդրադարձավ Սբ. Հովհաննես Իմաստասեր Օձնեցու ուսուցողական վարքին, գործունեությանը և «Օձի պորտ» կոչվող աղբյուրի պատմությանը: Տեր Հայրը մաղթեց, որ սրբերի բարեխոսությամբ, Աստված բոլորի ուխտն ընդունելի անի, առավել զորացնի հավատքի մեջ, հավիտենական կյանքի անսասան հույսը տա և սիրով լիացնի մարդկանց ու Աստծո հանդեպ:

Սբ. Պատարագի ավարտին, ուխտավորները եկեղեցու բակում սիրո ճաշ ունեցան, ապա շարունակեցին իրենց ուխտուղին դեպի Արդվին, ուր Սբ. Հովհան Օձնեցի հայրապետի աճյունն է ամփոփված: Արդվիի Սբ. Հովհաննես վանքում Զորավոր Սբ. Աստվածածին եկեղեցու համայնքը մասնակցեց Հանգստյան ժամերգությանը և օրվա հիշատակելի հայրապետների և վարդապետների բարեխոսությամբ՝ աղոթք բարձրացրեց առ Աստված Հայ եկեղեցու հոգևորաց դասի համար:

«Մեր աղոթքն է, որպեսզի Տերն Իր կողմից սուրբ ծառայության կոչված սպասավորներին, ուժ, կարողություն տա՝ ամրանալու իրենց ուխտի մեջ և հովվելու իրենց հանձնված հոտը: Առանձնահատուկ ուրախություն է հոգու խորքում ունենալ մեր հայրապետների և վարդապետների լուսավոր կերպարները, նրանց բարեխոսությանը դիմել, և այդ ուրախությունը կրկնապատկել՝ ձգտելով այն հոգու գեղեցկությանը, որ ունեին իրենք»,- ասաց Տեր Գրիգորը:

Ուխտավորներից 11-ամյա Ալեքսը մասնակցել է ուխտագնացությունների, բայց Օձունում առաջին անգամ էր: Աստծո տունն իր համար աղոթելու և Նրա օրհնությունը ստանալու մի վայր է:

Ռուզաննան նույնպես չէր եղել Օձունում. «Տպավորված եմ բնությամբ, եկեղեցու շնչով և ոգով, նույնիսկ եկեղեցու բակի այս կանաչ եղևնին է ինձ համար այլ խորհուրդ ստացել: Այս բազմադարյան սրբավայրն ինձ ուժ և հոգու հանգստություն պարգևեց»,-ասաց նա:

«Ուրախ եմ, որ Մեծ պահքի այս շրջանում տարվա առաջին ուխտագնացությամբ արժանի եղա այս սրբավայրում մասնակից լինել բաց Պատարագի՝ հաղորդվելով Տիրոջ Մարմնին և Արյանը, ինչպես նաև՝ Սբ. Հովհան Օձնեցու բարեխոսությունը խնդրել՝ այցելելով նրա գերեզմանին»,-ասաց ուխտավորներից Սիմոնը:

Ուխտագնացությունը մեծ ուրախություն էր պարգևել ուխտավորներին: Եկեղեցու հայրերից մեկն ասել է, որ մենք երջանիկ ենք արդեն նրանով, որ պատկանում ենք Քրիստոսահիմն եկեղեցուն, որ սովորեցրել է մեզ աղոթել, որ բացահայտել է մեզ համար իմաստությունը և շարունակում է տեսանելի ու անտեսանելի կերպով ուղղորդել մեզ դեպի Ճանապարհ, Ճշմարտություն և Կյանք:

 

Կարինե Սուգիկյան

27.02.16
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․