Լուսավոր ու բարի գործերը վկայվում են կյանքով

Ամանորը պարզապես Նոր տարի չէ, այն իր մեջ նոր սկիզբ է պարունակում, որ կապված է համաշխարհային պատմության մեջ տեղի ունեցած ամենամեծ իրադարձության՝ Աստվածորդու մարդացման հետ: Այդ է պատճառը, որ եկեղեցական տոնացույցի համաձայն՝ դեկտեմբերի 30-ից սկսվում է պահեցողության շրջան, որ նախորդում է բոլոր տոների սկիզբը համարվող տոնին՝ Սուրբ Ծննդյանը: Պահքի յուրաքանչյուր օրը աղոթքի, ապաշխարության, հոգու փրկության համար կատարված մի քայլ է, որ առաջնորդում է դեպի Աստված: Դեպի Աստված տանող ուղին չի կարող ընթանալ այլ կերպ, եթե ոչ լուսավոր ու բարի գործերով:

Դեկտեմբերի 30-ին Զորավոր Ս. Աստվածածին եկեղեցու հոգևոր հովիվ Տեր Գրիգոր քահանա Գրիգորյանը, Ս. Ծննդյան տոնին ընդառաջ, եկեղեցու համայնքի անդամներին ու աշխատակիցներին փոխանցեց սննդի փաթեթներ, որ տրամադրել էին «Մարտին Սթար» ՍՊԸ-ն՝ հանձինս տնօրեն Անդրանիկ Բաբոյանի, «Էրիզ» ՓԲԸ- ն՝ հանձինս տնօրեն Արսեն Ասլանյանի և «ԼԻԱ-Կ Գրուպ» ՍՊԸ-ն՝ հանձինս տնօրեն Անդրանիկ Գասպարյանի:

Քրիստոս Իր երկրային կյանքի ընթացքում ծառայեց մարդկությանը՝ նրան ժառագություն թողնելով Իր բարի օրինակը (Հովհ. 13): Տիրոջ օրինակին հետևելով՝ քրիստոնյան իր հավատքը կենդանի է պահում գործով և ոչ թե խոսքով: Նա Լույսի մասին նախ և առաջ վկայում է կյանքով և ոչ թե խոսքով: Այդ պատճառով Տերն Իր հետևորդներին աշխարհի լույսը անվանեց և ասաց, որ ճրագը վառելիս կաթսայի տակ չեն դնում, այլ աշտանակի վրա, որպեսզի լույս տա տան մեջ գտնվողներին. «Այդպես էլ թող ձեր լույսը շողա մարդկանց առջև, որպեսզի նրանք տեսնեն ձեր բարի գործերը և փառավորեն ձեր Հորը, որ երկնքում է» (Մատթ. 5:15-17): «Բոլորիս ուղղված Տիրոջ այս խոսքն անասելի մեծ պատիվ, կոչում և միևնույն ժամանակ մեծ պատասխանատվություն է մեզ համար, որը ստիպում է մեզ արթնանալ հոգևոր նիրհից և գործի անցնել, քանի որ Քրիստոսի փրկչական լույսը չենք ստացել, որ թաքցնենք, պահենք կամ էլ Աստված մի արասցե՝ կորցնենք: Այլ ստացել ենք այն մեծագույն ակնածանքով և հոգատարությամբ վառ պահելու և մեր նմաններին էլ լուսավորելու համար: Մեր հոգում աստվածային լույսը կրելով, Նրա անսահման սերն ունենալով, սիրահոժար կերպով պատրաստ պիտի լինենք զոհաբերության՝ հանուն Աստծու և մեր մերձավորի, այդ զոհաբերության մեջ ընդգրկելով մեր էության բոլոր բնագավառները՝ մեր «ես»-ը, ժամանակը, հոգեկան, ֆիզիկական և նյութական միջոցները»,- ասաց Տեր Գրիգորը:

Կարինե Սուգիկյան