Գրքեր

Նոր Խարբերդի մանկատանն անցկացվեց բժշկական խորհրդատվություն

Մայիսի 11-ին Զորավոր Ս. Աստվածածին եկեղեցու համայնքը, «Արև երեխաներ» երեխաների առողջության և զարգացման կենտրոնի հետ համատեղ, ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ և հոգևոր հովիվ Տեր Գրիգոր քահանա Գրիգորյանի գլխավորությամբ, կազմակերպեցին, որ Նոր Խարբերդի մասնագիտացված մանկատան Դաունի համախտանիշ ունեցող տասներկու երեխաներ անցնեն էնդոկրինոլոգի խորհրդատվություն: Նշենք, որ մարտի 28-ին մանկատան Դաունի համախտանիշ ունեցող տասներկու երեխաներն անցնել էին արյան ցիտոգենետիկական հետազոտություն, կարիոտիպ, հորմոնալ և արյան կլինիկական հետազոտություններ: Ըստ այդ բժշկական հետազոտությունների արդյունքների՝ խորհրդատվությունն անցկացրեց և բուժում նշանակեց «Մուրացան» հիվանդանոցային համալիրի էնդոկրինոլոգիական կլինիկայի մանկական էնդոկրինոլոգ Գայանե Բայբուրդյանը: «Երեխաներն, ըստ իրենց խնդիրների համապատասխան, բուժում կստանան: Այս տարվա մեջ նրանք կրկին անգամ կանցնեն էնդոկրին հետազոտություններ, քանի որ Դաունի համախտանիշ ունեցող երեխաները մինչև կյանքի վերջ փոխարինող թերապիայի կարիք ունեն»,- ասաց մանկաբույժը:

Տեր Գրիգորը նշեց, որ երեխաների հետազոտության և բուժման համար անհրաժեշտ միջոցները ապահովում է Զորավոր Ս. Աստվածածին եկեղեցու համայնքը և «Արև երեխաներ» երեխաների առողջության և զարգացման կենտրոնը:

Մեր Տերը՝ Հիսուս Քրիստոս, ասում է. «Ով այս փոքրիկներից մեկին միայն մի բաժակ սառը ջուր խմեցնի աշակերտի անունով, ճշմարիտ եմ ասում ձեզ, նա իր վարձքը չի կորցնի» (Մատթ. 10:42): Պողոս պատրիարք Անդրիանուպոլսեցին գրում է, որ գթություն կարելի է անել՝ ըստ կարողության և ցանկության: Եթե մեկը չունի կարողություն և ունեցվածք՝ կարոտյալներին առատաձեռն օգնելու, թող այնքան տա, որքան կարող է:

 

Կարինե Սուգիկյան

11.05.18
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․