Գրքեր

Ողորմած լինելու մասին

Ոմն ծեր մի եղբոր հետ բնակվում էր խցում, և նա խիստ ողորմած էր: Սով եղավ, և շատերն սկսեցին քաղցել և գալիս էին նրա դուռը, որպեսզի ողորմություն անի իրենց, իսկ նա բոլորին հաց էր տալիս: Եղբայրը տեսնելով, որ շատ է դուրս տալիս, ասաց ծերին. «Տո՛ւր իմ բաժին հացը»: Եվ նա ասաց. «Վերցրո՛ւ՝ ինչպես կամենում ես»: Եվ բաժանեցին հացը. վերցրեց եղբայրն իր բաժինն առանձին, իսկ ծերն իր բաժին հացից ողորմություն էր անում: Եվ շատերն էին լսում ու գալիս ծերի մոտ, իսկ նա բոլորին էլ հաց էր տալիս: Եվ Աստված, տեսնելով ծերի բարյացակամությունը, օրհնեց նրա հացը: Եղբայրը կերավ իր բաժին հացը և ծերն ասաց. «Ահա ես էլի հաց ունեմ, ե՛կ վերստին համատեղ ապրենք»: Եվ նա ասաց՝ լավ, և երկրորդ անգամ միացրին հացերը: Եվ դարձյալ առատություն եղավ, դարձյալ գալիս էին ծերի մոտ, խնդրում էին նրանից, և նա տալիս էր նրանց: Պատահեց այնպես, որ հացը սպառվեց, և եղբայրը մտնելով՝ տեսավ, որ հացը վերջացել է: Եվ մի աղքատ եկավ, որ հաց խնդրի, ծերն ասաց. «Մտի՛ր և հա՛ց տուր նրան»: Եղբայրն ասաց. «Չկա, որովհետև հացն սպառվել է»: Եվ ծերը նրան ասաց. «Մտի՛ր և փնտրի՛ր»: Եվ նա մտնելով՝ գտավ հացի կողովը բերնեբերան լցված հացով և մեծ երկյուղածությամբ վերցնելով՝ տվեց աղքատին և ճանաչելով ծերի առաքինությունն ու հավատը՝ փառաբանեց Աստծուն:

 

«Սուրբ հայրերի վարքն ու կենցաղավարությունը» գրքից, Հատոր Ա, Էջմիածին 2016

03.07.22
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․