Գրքեր

Քրիստոնյան կոչված է իր կյանքով փառավորելու Տիրոջ անունը

Հունվարի 15-ին Զորավոր Ս. Աստվածածին եկեղեցում, հոգևոր հովիվ Տեր Գրիգոր քահանա Գրիգորյանը, սոցիալական ծրագրերի շրջանակներում, Ֆրանգուլյան Քնարիկին (61 տ.) հանձնեց դրամական օգնություն (100 ԱՄՆ դոլար), որ տրամադրել էր ամերիկաբնակ Կարեն Վարդանյանը: Տիկին Քնարիկն իր դստեր հետ բնակվում է Գրիգոր Զոհրաբ 114 հասցեում գտնվող տանը, որ զուրկ է կենցաղավարության տարրական պայմաններից: Տիկին Քնարիկը կանացի օրգանների չարորակ ուռուցք ունի, բայց ֆինանսական խնդրի պատճառով չի կարողանում բուժման գնալ: Նրա տղան մահացել է ավտովթարի հետևանքով, իսկ դուստրը հոգեկան ծանր խանգարում ունի: «Մեզ հասանելիք թոշակի մեծ մասը ծախսում եմ աղջկաս բուժման համար: Շնորհակալ եմ աջակից անձին, որ օգնության ձեռք մեկնեց մեզ»,- ասաց տիկին Քնարիկը:

Քրիստոնյան կոչված է իր կյանքով փառավորելու Տիրոջ անունը: Կյանքի ուղին աստվածահաճո ընթացք է ունենում, եթե որպես խթան ունի Աստծո հանդեպ սերը: Ս. Հովհաննես առաքյալն իր նամակում գրել է, որ սեր ունեցողը վախ չունի, որովհետև կատարյալ սերը հեռու է վանում վախը (Ա Հովհ. 4:18): Առաքյալը շատերին էր հորդորում, որ իրենց սրտում աճեցնեն աստվածային սերը՝ որպես անխորտակելի և անընկճելի մի ուժ: Երբ նրան հարցնում էին, թե որն է Աստծուն հաճելի լինելու լավագույն միջոցը: Նա պատասխանում էր՝ սիրո գործերը: Աստվածահաճո կյանքին ձգտողը ջանում է ամուր մնալ աստվածային սիրո մեջ. «Ո՞վ կարող է բաժանել մեզ Քրիստոսի սիրուց՝ նեղությո՞ւնը, անձկությո՞ւնը, հալածա՞նքը, սո՞վը, մերկությո՞ւնը, վտա՞նգը կամ սո՞ւրը» (Հռոմ. 8:35): Մի օր Ս. Անտոն Մեծին եղբայրները հարցրեցին՝ արդյո՞ք ճիշտ է այն, որ ինչ որ մեկն ասի՝ ես ոչինչ չեմ վերցնի եղբայրներից և ինքս էլ ոչինչ չեմ տա, ինձ համար բավական է իմը: Սուրբը պատասխանել է. «Զավակներս, այդպիսի մեկը դաժան սիրտ ունի և բարի գործերից օտարացած մեկն է: Մեծ անմտություն է ուրիշին պատգամելը այն, ինչ ինքդ չես անում, քանի որ ոչ մի օգուտ չես կարող քաղել ուրիշի կողմից արված գործերից: Անհրաժեշտ է գործով փառավորել Տիրոջ անունը»:

 

Կարինե Սուգիկյան

15.01.20
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․