Քրիստոնյայի կյանքում կենդանի իրականություն է աստվածային բարիքը

Աստվածային և հավիտենական բարին մարդու համար հեռավոր և ոչ տեսանելի մի իրողություն չէ, ոչ էլ երազանք կամ հնարանք, այլ կենդանի իրականություն, որ հասանելի է մարդկությանն ու նրա փորձառությանը: Աստվածային բարին մարդը կարող է ձեռք բերել և դարձնել իրենը՝ նրանով լիացնելով իր սիրտը, հոգին և մարմինը: Եթե մարդն իր ողջ էությամբ փնտրում է Աստծուն, ապա առաջին հերթին այդ մեծագույն բարիքին նախ ինքն է արժանանում՝ միաժամանակ բաժնեկից դարձնելով իր մերձավորներին և բոլոր մարդկանց: Քրիստոսին հետևող և աստվածահաճո կյանքով ապրող անձի մեջ գործում է աստվածային բարին, որը լուսավորում է իր շուրջը և լույս բաշխում ամենուր:

ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ, Զորավոր Ս. Աստվածածին եկեղեցու համայնքն իր սոցիալական ծրագրերով մասնակից և բաժնեկից է դառնում աստվածային բարիքին: Հունվարի 15-ին Զորավոր Ս. Աստվածածին եկեղեցում, հոգևոր հովիվ Տեր Գրիգոր քահանա Գրիգորյանը Կարապետյան Վիլիկին (66 տ.) հանձնեց Բաղդասարյան ընտանիքի աջակցությամբ գնված սննդի փաթեթ: Վիլիկը բնակվում է Քանաքեռ-Զեյթուն վարչական շրջանի Ռուբինյանց փողոցի 19/1,40 հասցեում, նրա կինը մահացել է, իսկ երկու դուստրերն ընտանիք են կազմել: Առողջական խնդիրներ ունենալով հանդերձ՝ Վիլիկը որպես հսկիչ է աշխատում, որպեսզի հոգա իր կարիքները: «Շնորհակալ եմ Զորավոր Ս. Աստվածածին եկեղեցու համայնքից, Տեր Գրիգորից և աջակից անձից՝ ինձ օգնության ձեռք մեկնելու համար»,- ասաց նա:

Ողորմած մարդը հնարավոր է իր ճանապարհին փորձությունների հանդիպի, բայց հետևյալ պատմությունը վկայում է, որ անկախ դժվարություններից՝ նա պետք է շարունակի իր ճանապարհը: Եղբայրն ասաց աբբա Պիմենին, երբ իմ եղբորը մի կտոր հաց կամ որևէ ուրիշ բան եմ տալիս, ապա չարը արատավորում է այդ ողորմածությունը՝ այն որպես մարդահաճություն համարելով: Հայրն ասաց՝ անգամ եթե դա արվել է մարդահաճությունից ելնելով, բայց հարկավոր է եղբորը տալ անհրաժեշտը և պատմեց հետևյալ առակը. «Երկու հողագործներ էին ապրում նույն քաղաքում: Նրանցից մեկը սերմանեց, բայց քիչ և անմաքուր, իսկ մյուսը, ծուլանալով, ոչինչ չարեց: Երբ սով սկսվի, նրանցից ո՞ր մեկը կգտնի սնունդ»: Եղբայրը պատասխանեց՝ քիչ և անմաքուրը սերմանողը: Հայրը նրան ասաց՝ այդպես և մենք պետք է սերմանենք, անգամ եթե դա լինի քիչ և անմաքուր, որպեսզի չմահանանք սովից:

Կարինե Սուգիկյան