Գրքեր

Ս. Ծննդյան տոնին ընդառաջ երկու տոննա սնունդ բաշխվեց կարիքավոր ընտանիքերին

Ամանորի նախաշեմին քրիստոնյան իր կյանքի ուղին վերաիմաստավորվում է յուրահատուկ մի ճամփորդությամբ՝ Ս. Ծննդյան տոնին նախորդող շաբաթապահքով: Յուրահատուկ այս ճամփորդության ընթացքը հնարավորություն է տալիս ճամփորդներին տեսնելու և արմատախիլ անելու արդեն գուցե սովորական դարձած իրենց մեղքերն ու վատ սովորությունները և օրեցօր բարու մեջ հաստատվելով՝ դեպի Աստված ընթանալու: «Պետք է փորձենք առավելագույնս օգուտ քաղել ապաշխարության այս շրջանից և մարմնական կերակուրներից հրաժարվելով՝ ամրացնենք և վերստին նորոգենք մեր հոգևոր մարմինը: Մտքով, խոսքով ու գործով, Աստծու և մերձավորի հանդեպ ցուցաբերած իսկական սիրո արտահայտությամբ ջանանք արժանանալ դրախտի լիիրավ ժառանգորդները լինելու իրավունքին»,- ասաց Զորավոր Ս. Աստվածածին եկեղեցու հոգևոր հովիվ Տեր Գրիգոր քահանա Գրիգորյանը:

Եկեղեցական համայնքային կյանքից ներս իրագործվող սոցիալական ծրագրերը աստվածահաճո ընթացքի կարևորագույն մասն են համարվում: Զորավոր Ս. Աստվածածին եկեղեցու համայնքը, ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ և հոգևոր հովիվ Տեր Գրիգոր քահանա Գրիգորյանի գլխավորությամբ, սոցիալական ծրագրերի շրջանակում, Ս. Ծննդյան տոնին ընդառաջ համայնքի տարեց և միայնակ անդամներին ու անապահով ընտանիքներին տրամադրեց երկու տոննա սնունդ, որից 1500 կգ-ը «От Мартина» ընկերության տնօրեն Անդրանիկ Բաբոյանի կողմից էր, 500 կգ-ը՝ համայնքի կողմից:

Քրիստոնյան իմաստավորում է իր ընթացքը, երբ փորձում է իր վրա կրել Քրիստոսի նշանը: «Մեծ իմաստուն է նա, որ սեր է գոյացնում: Արդ, ինչպես առաքյալները քարոզով, մարգարեները՝ սովորեցնելով, նույնպես և դուք Աստծուց մեծ պարգև կստանաք, եթե ճշմարիտ սիրով սիրելիներ բազմացնեք: Ինչպես որ թագն ու ծիրանին ցույց են տալիս, թե ով է թագավորը, իսկ առանց նրանց, եթե նույնիսկ ոսկյա հագուստ էլ ունենաս, միևնույն է թագավոր լինելդ չի իմացվի, նմանապես, եթե ամեն տեսակի առաքինություններ ունենաս և եթե նույնիսկ կարողանաս հրաշքներ գործել, սակայն սեր չունենաս, չի իմացվի, թե արդյո՞ք դու պատկանում ես Քրիստոսին: Սա է կնիքը, այսինքն՝ Քրիստոսի նշանը, Տիրոջ խոսքի համաձայն, թե՝ «Իմ աշակերտներն եք, եթե իրար սիրեք» (Հովհ. 13:35)»,- ասել է Բարսեղ վարդապետ Մաշկևորցին:

 

Կարինե Սուգիկյան

30.12.19
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․