Գրքեր

«Սերը հաղթահարում է ամեն ինչ»

Փետրվարի 15-ին Զորավոր Ս. Աստվածածին եկեղեցու համայնքը, ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ և խորհրդակատար Տեր Վահան քահանա Առաքելյանի գլխավորությամբ, այցելեց սիրիահայ կարիքավոր Դոքմեջյան ընտանիքին, որ վարձակալությամբ բնակվում է Հրաչյա Քոչար 10/7 հասցեում: Ընտանիքի հայրը՝ Աբրահամ Դոքմեջյանը (65 տ.), նշեց, որ իր երեք որդիներից երկուսն իրենց ընտանիքներով ապրում են Սիրիայում և շուտով գալու են Հայաստան: «Կինս է միայն աշխատում, ես և որդիս՝ Րաֆֆին (24 տ.), առողջական խնդիրներ ունենք: Ես շաքարային դիաբետ ունեմ, իսկ որդիս 13 տարեկանից տառապում է էպիլեպսիայով, ինչը նրա մոտ ավելի սրվեց պատերազմական օրերին: Կնոջս վաստակածը չի բավարարում տան և կոմունալ վճարների, իմ և տղայիս համար անհրաժեշտ դեղորայքը գնելու համար»,- ասաց Աբրահամը:

Տեր Վահանը բժշկության աղոթք կարդաց ընտանիքի համար և նրանց հանձնեց դրամական օգնություն (100 ԱՄՆ դոլար), որ այս անգամ տրամադրել էր Արտեմիս Տեր-Հակոբյանը:

Աստծո հանդեպ սերը մղում է մարդուն բարեգործության: Այդ սերն ունենալու պատգամը տվեց մեզ Քրիստոս, որպեսզի սիրենք միմյանց և սիրենք զոհաբերվող սիրով:

Միտրոպոլիտ Անտոնի Սուրոժսկին ասել է, որ սիրել մերձավորին և պատրաստ լինել հանուն նրա կյանքը զոհաբերելու, չի նշանակում մահանալ, այլ ապրել. «Երբեմն ավելի դժվար է ապրելը, քան մահանալը: Երբեմն ավելի հեշտ է ակնթարթորեն այս կյանքից այլ կյանք տեղափոխվելը, իսկ տարեցտարի ապրելը, վկայելով Աստծո սիրո մասին, վկայում է այն մասին, որ սերն ավելի ամուր է, քան ատելությունը, որ կյանքը հավիտենական և ոչ երկրային, ավելի հզոր է, քան մահը և որ ոչինչ մեզ չի կարող բաժանել Քրիստոսի սիրուց: Հեշտ չէ ապրել, երբ քեզ շրջապատում է անտարբերությունը, ատելությունը և օտարացումը: Բայց պետք է ապրել և ապրել այնպես, որպեսզի Աստծո մոտ մնան կենդանի հաղթանակածները՝ ցնծագին վկայողներն այն մասին, որ սերը հաղթահարում է ամեն ինչ»:

 

 

Կարինե Սուգիկյան

15.02.17
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․