Սիրո ուղին ենթադրում է ըմբռնում, կարեկցանք և գթասրտություն

«Աստված այնքան սիրեց աշխարհը, որ մինչև իսկ իր միածին Որդուն տվեց, որպեսզի նա, ով հավատում է Նրան, չկորչի, այլ հավիտենական կյանք ունենա» (Հովհ. 3:16): Ամեն մարդ թանկ է Տիրոջ համար: «Սուրբ արյամբ ենք մենք գնված (Ա Պետ. 1:19), և այդ նպատակով իսկ Աստված երկրի վրա հայտնվեց՝ քեզ գնելու համար, ով մարդ, Աստված երկրի վրա հայտնվեց՝ անգամ գլուխ դնելու տեղ չունենալով (Ղուկ. 9:58)»,- ասել է Ս. Հովհան Ոսկեբերանը: Տիրոջ օրինակի համաձայն մարդուն արժևորելու ուղին սկիզբ է առնում սիրո ուղուց, որը նախ և առաջ ենթադրում է ըմբռնում, կարեկցանք, գթասրտություն և բարություն: Մերձավորին սիրելու և արժևորելու նպատակն են հետապնդում այն սոցիալական ծրագրերը, որ իրականացվում են եկեղեցական համայնքներում:

Սեպտեմբերի 9-ին Զորավոր Ս. Աստվածածնի եկեղեցու համայնքը, ամերիկաբնակ Կարեն Վարդանյանի հովանավորությամբ, հերթական անգամ իր աջակցությունը ցուցաբերեց կարիքավոր ընտանիքի: Եկեղեցու հոգևոր հովիվ Տեր Գրիգոր քահանա Գրիգորյանը դրամական օգնություն (100 ԱՄՆ դոլար) հանձնեց Խաչատրյան Արուսյակին (57 տ.): Յոթ հուգուց բաղկացած կարիքավոր ընտանիքը բնակվում է Շահումյան 2-րդ փողոցի 25/2 հասցեում, երկու փոքր և խոնավ սենյակներում: Տիկին Արուսյակը երկու որդի ունի, որոնցից մեկն ընտանիք է կազմել և երկու զավակ ունի: Նա, իր ամուսինը և մյուս տղան 2-րդ խմբի հաշմանդամ են, հոգեկան առողջության խնդիրներ ունեն, ընտանիքի մյուս անդամների մոտ բնակարանի խոնավության պատճառով ևս առողջական խնդիրներ են ծագել: Կարիքավոր ընտանիքում ոչ ոք ի վիճակի չէ աշխատելու, իսկ իրենց նվազագույն կարիքները մասամբ հոգում են հաշմանդամության թոշակների և ընտանեկան նպաստի գումարներով: Տիկին Արուսյակն իր երախտագիտությունը հայտնեց Տեր Գրիգորին և աջակից անձին՝ իրենց ընտանիքին օգնության ձեռք մեկնելու համար:

Կարինե Սուգիկյան