Սիրով գործածենք մեր ունեցածը՝ կարեկից լինելով մերձավորին

Հոգևոր և նյութական բարիքներ պարգևող Տերը կամենում է, որ մարդիկ միայն իրենց համար չապրեն, այլ իրենց ունեցածը սիրով գործածելով՝ ուրախակից և կարեկից լինեն մերձավորին: Քրիստոնյան կոչված է պտղաբեր կյանք ունենալու, քանի որ, անգործության տրվելով, կկորցնի ունեցածն էլ: Սեր ունեցողին Տերն այլ պարգևներ է շնորհում, իսկ նա, ով սեր չունի, կկորցնի այն, ինչ թվում է, թե ունի: Աստծու շնորհը չի սահմանափակում մարդու ազատությունը և չի ոտնահարում նրա էությունը: Սիրող Հայրը «կամենում է, որ բոլոր մարդիկ փրկվեն» (Ա Տիմ. 2:4) և, հետևաբար, յուրաքանչյուրին տալիս է շնորհ՝ որպես փրկության միջոց:

«Այսպիսով, ոչ ոք չպետք է ասի, թե ես մեկ շնորհ ունեմ և ոչինչ չեմ կարող անել: Մեկով կարող եք բարերար լինել: Դուք այն այրիից ավելի աղքատ չեք և ոչ էլ ավելի ցածր Պետրոս և Հովհաննես առաքյալների կոչումից, որ հասարակ ժողովրդից էին և անկիրթ... Այդ իսկ պատճառով Աստված մեզ պարգևեց խոսելու շնորհ, ձեռքեր, ոտքեր, մարմնական ուժ, միտք և հասկացողություն, որպեսզի կարողանանք օգտագործել այս ամենը մեր իսկ փրկության համար՝ ի շահ մերձավորի»,- ասել է Ս. Հովհան Ոսկեբերանը:

Սեպտեմբերի 4-ին, Զորավոր Ս. Աստվածածին եկեղեցու սոցիալական ծրագրերի շրջանակում, հոգևոր հովիվ Տեր Գրիգոր քահանա Գրիգորյանը համայնքի անդամ Դալլաքյան Արփիի կողմից դրամական աջակցություն (100 000 դրամ) փոխանցեց 3-ամյա Մոնիկայի ապաքինման համար, որի մոտ հայտնաբերվել է հազվադեպ հանդիպող հիվանդություն՝ նեյրոբլաստոմայի 4-րդ ստադիա:

Փոքրիկի ընտանիքն իր երախտագիտությունը հայտնեց աջակից անձին՝ ուշադրության և աջակցության համար: 

Կարինե Սուգիկյան