Զորավոր Ս. Աստվածածին եկեղեցու մեծ ընտանիքի ուրախ Կաղանդչեքը

Հունվարի 12-ին՝ Ս. Ծննդյան ութօրեքի յոթերորդ օրը, Սուրբ և Անմահ Պատարագին զանգերի ղողանջի ներքո հերթական անգամ հնչեց Ս. Ծննդյան ավետիսը՝ Քրիստոսի հրաշափառ Ծնունդը փառաբանելու կոչը ազդարարելով: Սուրբ Պատարագի ավարտին Զորավոր Ս. Աստվածածին եկեղեցու տիկնանց և «Զորավոր» երիտասարդաց միությունները, ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ, երիցատան դահլիճում Կաղանդչեքի ուրախ միջոցառում էին կազմակերպել:

Արդեն երրորդ տարին է, որ Զորավոր Ս. Աստվածածին եկեղեցու մեծ ընտանիքից ներս Կաղանդչեքի միջոցառմամբ ամանորյա ուրախ նվեր է մատուցվում ընտանիքի մյուս անդամներին: Միջոցառումն սկսվեց «Տերունական աղոթք»-ով: Բացման խոսքով հանդես եկավ տիկնանց միության ատենապետուհի Սաթենիկ Սիմոնյանը, որ ողջունելով ներկաներին՝ նշեց, որ Կաղանդչեքի կատակները վերաբերում են լուրջ թեմաներին, քանի որ իրենց մեջ սեր, դիտողականություն և իմաստություն են ներառում: Այնուհետև երիտասարդաց միության անդամներն անդրադարձան Կաղանդ և Կաղանդչեք բառերի իմաստներին՝ նշելով, որ Կաղանդչեքի նպատակն ուրախություն նվիրելն է, որը հույս է և ներշնչանք ու ապագային լավատեսորեն նայելու գրավական, իսկ Կաղանդչեքը հնավանդ սովորություն է, որի համաձայն վանքերում ապրող միաբանները այդ օրը ուրախ կատակներ էին անում, նմանակում իրար և ամենակարևորը իրարից չէին նեղանում, ինչը և հորդորեցին ներկաներին միության անդամները:

Մինչ Կաղանդչեքի հումորը «Տաղ Ծննդյան» շարականով հանդես եկավ «Զորավոր մանկունք» երգչախումբը՝ գեղարվեստական ղեկավար Լիլիթ Սիմոնյանի գլխավորությամբ: Ապա երիտասարդաց միության անդամները վերհիշեցին տարվա ընթացքում տեղի ունեցած հումորային իրադարձությունները եկեղեցու հոգևոր դասի և համայնքային կյանքի վերաբերյալ: Երիտասարդների ուրախ հումորների նշանակակետում էին ներկաներից շատերը: Ուրախ կատակներն ընդմիջվում էին «Զորավոր մանկունք»-ի երաժշտական կատարումներով: Առողջ հումորի վրա հիմնված ընտանեկան կաղանդչեքը ոգևորել և մեծ ուրախություն էր պատճառել լեփ-լեցուն դահլիճին՝ առավել ջերմացնելով ընտանեկան մթնոլորտը: Կաղանդչեքի ուրախ նվերից բացի համայնքի անդամներին վիճակահանությամբ ևս նվերներ տրվեցին:

Կաղանդչեքի ավարտին Զորավոր Ս. Աստվածածին եկեղեցու հոգևոր հովիվ Տեր Գրիգոր քահանա Գրիգորյանը շնորհակալություն հայտնեց Կաղանդչեքի նախաձեռնող՝ «Զորավոր» երիտասարդաց միության պատասխանատու Տեր Վահան քահանա Առաքելյանին և երիտասարդաց միության անդամներին, տիկնանց միությանը՝ գլխավորությամբ ատենապետուհի Սաթենիկ Սիմոնյանի և «Զորավոր մանկունք» երգչախմբին, որոնց համատեղ ջանքերով կյանքի կոչվեց ընտանեկան Կաղանդչեքը:

Զորավոր Ս. Աստվածածին եկեղեցու մեծ ընտանիքի տոնական ուրախությունը երեկոյան շարունակվեց «Յասաման» ռեստորանում: Ուրախության և սիրո սեղանի շուրջ միախմբված համայնքի անդամները գոհություն հայտնեցին Տիրոջը՝ իրենց մեծ ընտանիքի համար և զրուցեցին իրենց նոր ծրագրերի ու անելիքների մասին:

Կարինե Սուգիկյան