Փրկության արժանանալու համար անհրաժեշտ է լինել Քրիստոսի Մարմնի անդամը

Ըստ Հայ Առաքելական Սուրբ եկեղեցու տոնացույցի՝ այս տարի մարտի 17-ին Մեծ պահքի վեցերորդ կիրակին  է, որ կոչվում է Գալստյան: Կիրակին հորդորում է պատրաստ լինել Տիրոջ երկրորդ գալստյանը, այսինքն՝ հոգալ հոգու փրկության մասին: Աստծու Որդին Մարդու Որդի դարձավ, որպեսզի միավորի մեղքի պատճառով պառակտված ու անկյալ մարդկությանը և դեպի փրկություն առաջնորդի: Մեղքը հեռացնում է մարդուն Աստծուց՝ սիրո Աղբյուրից, խաթարում է մարդու հոգու խաղաղությունը, խեղաթյուրում է մարդու մեջ Աստծու պատկերն ու նմանությունը, թշնամություն  հաստատում մարդկանց միջև՝ սերմանելով նախանձ և ատելություն։

Ոչ ոք միայնակ չի կարող փրկվել, անհրաժեշտ է միավորվել Քրիստոսով, քանի որ «միացած լինելով Քրիստոսին՝ մենք բոլորս մեկ մարմին ենք» (Հռոմ. 12:5): Քրիստոսի հետ «միաձուլվելով»՝ եկեղեցական համայնքները գիտակցում են, որ «ի Քրիստոս մկրտվելով՝ Քրիստոսով են զգեստավորվել, ուրեմն խտրություն չկա ո՛չ հրեայի և ո՛չ հեթանոսի, ո՛չ ծառայի և ո՛չ ազատի, ո՛չ արուի և ո՛չ էգի, որովհետև դուք ամենքդ մեկ եք ի Քրիստոս Հիսուս» (Գաղ.3: 26-28):

Մարտի 17-ին Զորավոր Ս. Աստվածածին եկեղեցու մեծ համայնքի երիտասարդ անդամները՝ «Զորավոր» երիտասարդաց միությունը, Տերունի օրն իր մեծ ընտանիքի հետ միասին Զորավոր Ս. Աստվածածին եկեղեցում մասնակից եղավ Սուրբ և Անմահ Պատարագի, ապա,  միության պատասխանատու Տեր Վահան քահանա Առաքելյանի առաջնորդությամբ, մեկնեց ուխտագնացության՝ ուղևորվելով դեպի Խոր Վիրապ: Հնագույն սրբավայրում երիտասարդ միությունը, Տեր Հոր գլխավորությամբ, կրկին անգամ միավորվեց միասնական աղոթի շուրջ և սբ. Գրիգոր Լուսավորչի բարեխոսությամբ՝ Տիրոջ ողորմածությունը հայցեց Հայոց ազգի, եկեղեցու և բանակի համար: Այնուհետև երիտասարդները վայելեցին սիրո ճաշը, Սուրբ Պատարագի և այլ թեմաների շուրջ հարցեր ուղղեցին Տեր Վահանին, ծավալվեց հոգեշահ զրույց: Երիտասարդները Տեր Հոր հետ քննարկեցին նաև իրենց հետագա անելիքներն ու ծրագրերը:

Որպեսզի Աստծու պատկերն ու նմանություն ունեցող անձը փրկության արժանանա և հավիտենական երանելի կյանքը ժառանգի, պետք է ուշադրություն դարձնի այն խոսքերին, որ ասաց Քրիստոս. հավատա Աստծուն (Հովհ. 3:14-16), սիրի Աստծուն և իր մերձավորին  (Ղուկ. 10:25-28), հետևի Աստծու պատվիրաններին (Մատթ.19:17), հաղթահարի դեպի Աստված գնալու խոչընդոտները (Մատթ. 19:29), անկեղծ զղջում ապրի (Եզեկ.18:21), արժանապես հաղորդվի Տիրոջ Մարմնին և Արյանը (Հովհ. 6:51; 54), բարին գործի (Հռոմ. 2:6-7) և Քրիստոսահիմն եկեղեցու անդամը լինի, քանի որ, Հիսուս Քրիստոսը, Պողոս առաքյալի խոսքի համաձայն, եկեղեցու գլուխն է (Կող. 1:18), փրկության արժանանալու համար անհրաժեշտ է լինել Նրա մարմնի անդամը, այսինքն՝ եկեղեցու անդամը։

Կարինե Սուգիկյան