Գրքեր

Ձիավորը, գյուղացին ու աղքատը

Մի ծեր վանական գնաց ճգնելու և տասը տարվա ընթացքում Աստծուն մի բանի համար էր աղոթում, որպեսզի իմանա, թե երկրի վրա ինչու են ոմանք հարուստ ծնվում, իսկ ոմանք՝ աղքատ: Հատկապես, երբ հաճախ որևէ տաղանդով օժտված մարդիկ աղքատ են, իսկ հարուստներն առանձնապես ոչնչով աչքի չեն ընկնում, որպես անհատականություն, այլ ուղղակի հաջողակ ընտանիքում են ծնվել: Ինչո՞ւ է այդպիսի անարդարաթյուն տեղի ունենում:

Եվ ահա, Աստված ողորմաց նրան և Իր հրեշտակին ուղարկեց նրա մոտ: Հրեշտակն ասաց.

- Ոչինչ չեմ բացատրի քեզ: Ուղղակի աչքերդ փակիր:

Ծերը փակեց աչքերն ու երբ բաց արեց, հայտնվեց մի ծառի փչակում: Հրեշտակը շարունակեց.

- Այստեղ երեք օր կմնաս: Հետևիր, թե ինչ կկատարվի:

Եվ վանականն սկսեց հետևել:

Առաջին օրը մի ձիավոր սլացավ՝ սևաթույր ձիուն հեծած, շողացող զրահներով: Ծառի մոտով անցնելիս, թամբին կապված պարկը պատահաբար արձակվեց ու վայր ընկավ: Հաջորդ օրը մի գյուղացի եկավ, նստեց ծառի տակ, արձակեց ուտելիքի կապոցը, որպեսզի ճաշի, բայց հանկարծ պարկը նկատեց: Տեսավ, որ պարկի մեջ ոսկի է, շատ ուրախացավ և ուտելիքը ծառի տակ թողնելով՝ վերցրեց պարկն ու վազելով հեռացավ: Երրորդ օրը մի աղքատ թափառական էր անցնում, տեսավ ուտելիքն ու ագահությամբ վրա պրծավ դրան: Չէր հասցրել ճաշն ավարտել, երբ ձիավորը վերադարձավ ու սկսեց իր փողերը պահանջել: Տանջեց նրան, իսկ հետո, հասկանալով, որ անօգուտ է, սպանեց նրան: Եվ այստեղ վանականը չդիմացավ ու սկսեց զայրույթից բղավել.

- Դու խոստացար հարցերիս պատասխանը տալ, բայց ես անարդարության ևս մեկ տեսարանի ականատեսը եղա:

- Սպասիր,- պատասխանեց հրեշտակը,- Հիմա կբացատրեմ տեսածիդ իմաստը: Այն ձիավորը հարուստ էր: Նա անցնում էր իր կալվածքներով ու տուրք հավաքում: Նա այդ կորցրած պարկի պես դեռ շատ պարկեր ուներ: Ուղղակի ագահությունը թույլ չէր տալիս կանգ առնել: Ոսկուց բացի ուրիշ արժեքավոր բան չուներ: Այն գյուղացին սնանկացել էր և իր ողջ ունեցվածքը գրավի տակ դրել: Երեկ գումարը վճարելու վերջին օրն էր և եթե նա այդ պարկը չգտներ, ապա ամեն ինչ կկորցներ ու բանտ կընկներ: Բայց նա ամբողջը վճարեց իր գտած ոսկով ու փրկեց իրեն ու իր ընտանիքը: Այն աղքատ թափառականը, երիտասարդ տարիքում, հարբած ժամանակ մարդ էր սպանել: Դրանից հետո ողջ կյանքը տանջվել էր, ունեցվածքն ամբողջությամբ աղքատներին բաժանել և աղաչել էր Աստծուն, որ իրեն տանջալից մահ տա՝ իր մեղքը քավելու համար: Երեկ նրա ցանկությունը կատարվեց և այժմ ոչ միայն իր մեղքն է քավել, այլև դարձել է Սուրբ Նահատակ: Իսկ նրան սպանած ձիավորին կսկսեն մղձավանջները տանջել: Նա կզղջա գործածի համար ու կսկսի աղքատներին օգնել:

 

Ռուսերենից թարգմանությունը՝ Էմիլիա Ապիցարյանի

06.10.15
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․