Գրքեր

Սեր և հագեցում

Հայր Պորֆիրիոսը միշտ տարբերություն էր դնում աշխարհիկ ու հոգևոր սիրո միջև․

- Քրիստոսի հանդեպ սերը տարբեր է աշխարհիկ սիրուց․․․ Այն չունի վերջ, չունի հագեցում։ Այն կյանք է տալիս, զորություն, առողջություն, տալիս է, տալիս․․․ Եվ որքան շատ է տալիս, այնքան մարդ ուզում է սիրել, իսկ մարդկային սերը կարող է պղծել մարդուն, մթագնել նրա գիտակցությունը։

Երբ սիրում ենք Քրիստոսին, ցանկացած այլ սեր նահանջում է։ Ցանկացած այլ սեր հագեցում ունի, իսկ Քրիստոսի սերը հագեցածություն չի ճանաչում։ Մարմնական սերը հագենում է։ Դրանից հետո կարող է խանդ սկսվել, վեճեր, անգամ մինչև մարդասպանություն։ Այն կարող է փոխվել ատելության։

Իսկ Քրիստոսով սերը չի փոխվում։ Աշխարհիկ սերը կարճատև է և աստիճանաբար մարում է, իսկ աստվածային սերն անընդհատ մեծանում ու խորանում է։ Ցանկացած այլ սեր կարող է մարդուն հասցնել հուսահատության։ Իսկ աստվածային սերը բարձրացնում է մեզ Աստծու ոլորտ, շնորհում է հանգիստ, ուրախություն ու լիություն։ Մյուս վայելքները հոգնեցնում են, իսկ այդ սիրուց չես հագենում։ Այդ վայելքն անհագուրդ է և որևէ մեկի համար երբևէ բեռ չի դառնում։ Դա բացառիկ բարիք է։

Քրիստոսի հանդեպ սիրո մեջ հագեցում լինում է միայն մեկ կետում, երբ մարդ միավորվում է Քրիստոսին։ Նա սիրում է, սիրում, սիրում և որքան շատ է սիրում, այնքան շատ է տեսնում, որ ուզում է ավելի սիրել։ Նա տեսնում է, որ դեռ չի միավորվել, դեռ չի տրվել Աստծու սիրուն։ Նա անդադար սնում է ցանկությունը, ձգտումը, ուրախությունը, որպեսզի հասնի բացառիկ ցանկությանը՝ Քրիստոսին։

Անդադար պահք է պահում, երկրպագություններ անում, հարատև աղոթում է, սակայն չի բավարարվում։ Նա չի հասկանում, որ արդեն հասել է այդ սիրուն։ Նա չի զգում, որ այն, ինչին ձգտում է, համակել է իրեն, որ ինքը ստացել է դա, չի զգում, որ ապրում է դրանով։

 

Ռուսերենից թարգմանեց Էմիլիա Ապիցարյանը

 

26.01.23
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․