19 Մարտ, Գշ, Մեծ պահքի ԼԷ օր

Գրքեր

Արդյո՞ք Աստծո կամքն է

Մի ուսանող նայում է պատուհանից և մտածում, թե ինչպես վարվել, քանի որ ջերմություն ունի, վատառողջ է, իսկ դրսում քամի է, ցուրտ, ամպամած եղանակ: Բայց իր թերահավատ ընկերն այդ կիրակի համաձայնվել է իր հետ գնալ եկեղեցի` մասնակցելու Սբ. Պատարագին: Ինչպե՞ս վարվել, ուղեկցել ընկերոջը եկեղեցի և բացատրել նրան Սուրբ Պատարագի խորհուրդը, թե՞ չգնալ.... Իսկ ժամանակն անցնում է և շատ հեռվից արդեն լսվում են եկեղեցու զանգերի հնչյունները:

- Խնդրում եմ, Տե՛ր Աստված, ցույց տուր քո կամքը, ինչպես գործել,- բարձրաձայն աղոթում է երիտասարդը:

- Չե՞ս լսում եկեղեցու զանգերի ձայնը, հիշիր պատվիրանը` սիրիր ընկերոջդ,- լսվում է մի ձայն, և ուսանողը տեսնում է քիչ հեռու կանգնած սատանային ու զարմացած ասում.

- Իսկ ասում են, թե սատանան միշտ չարն է կամենում:

Այնուհետև շտապ զանգում է ընկերոջը ու դուրս գալիս տնից: Որոշ ժամանակ անց եկեղեցու մոտ շտապօգնության մեքենա է կանգնում ու ցրտից սարսռած ուսանողին պատգարակով տանում են մեքենան: Երիտասարդն իր գլխավերևում տեսնում է Հիսուսին ու հարցնում.

- Աստված իմ, բայց չէ՞ որ գրված է` սիրիր ընկերոջդ, և ես նրան ուղեկցել եմ եկեղեցի: Ինչո՞ւ այսպես ստացվեց.

Հիսուս պատասխանում է.

- Սատանան ճշմարտությունը միշտ կիսատ է ասում:

Մի՞թե չես հիշում` սիրիր ընկերոջդ, ինչպես սիրում ես քո անձը: Չէ՞ որ կարող էիր կազդուրվել և հաջորդ կիրակի ընկերոջդ եկեղեցի ուղեկցել: Քեզ չկանչեցի զոհողության, այլ սիրիր ընկերոջդ, ինչպես սիրում ես քո անձը:

Աստծո կամքը հասկանալու համար նախքան քայլ կատարելը անհրաժեշտ է գնահատել, թե ինչ հետևանքներ ու պտուղներ է բերելու այդ քայլը: Եթե հետևանքներն ու պտուղները բարի են և քեզ համար, և մյուսների համար: Ուստի, դա է Տիրոջ կամքը:

 

.Հովհաննես Մանուկյան

19.06.20
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․