5 Հունիս, Ուր, Զ օր Հոգեգալստյան, Պահք

Գրքեր

«Տիրոջ նախախնամությունն իմ առջև նոր ուղի հարթեց»

Հարցազրույց Զորավոր Սուրբ Աստվածածին եկեղեցու խորհրդակատար Տեր Զգոն քահանա Աբրահամյանի հետ

Տասը տարի առաջ՝ սեպտեմբերի 18-ին, քահանայական ձեռնադրությամբ սրբալույս մյուռոնի օծմամբ արժանացաք քահանայագործման նվիրական ծառայությանը՝ հանձն առնելով մարդու մեջ աստվածակերտ պատկերը լուսավորելու և դեպի Աստված ուղղորդելու կարևոր առաքելությունը: Շնորհավորում ենք Ձեզ, Տեր Հայր, աստվածադիր քահանայության այդ ուղին ջանադրորեն ստանձնելու կապակցությամբ: Թող Աստված ամուր և հաստատուն պահի Ձեզ՝ Քրիստոսի պատվելի խաչի ծանրությունը կրելու Ձեր ծառայական նվիրագործման մեջ:

Ինչպե՞ս պատահեց, որ «Ֆինանսներ և վարկավորում» մասնագիտության որակավորումը ստացած 30-ամյա երիտասարդը 2003 թ-ին իր քայլերն ուղղեց դեպի Մայր Աթոռ Սուրբ Էջմիածին՝ ուսանելու քահանայից պատրաստման լսարանում:

Զարմանք ապրելով իմ կայացրած որոշումից՝ այս հարցն ինձ հաճախ են տվել թե՛ իմ ազգականները, թե՛ ընկերներս և թե՛ բազմաթիվ այլ անձինք: Մանկությունս անցկացնելով Խորհրդային Միության աթեիստական քարոզչական մեքենայի ներքո՝ այնուամենայնիվ, կրել և պահպանել եմ իմ մեջ աստվածադիր հավատքը: Անգամ մանուկ տարիքում նկատում էի Աստծո նախախնամության ներգործությունը շրջապատող մարդկանց կյանքում: Սիրելով տնտեսագետի մասնագիտությունը՝ սովորել և աշխատել եմ իմ մասնագիտությամբ: Սակայն, Տիրոջ նախախնամությամբ ստեղծվեց մի իրավիճակ, որն իմ առջև նոր ուղի հարթեց: Ես գոհություն եմ հայտնում Աստծուն իմ կյանքում նման բարենորոգ փոփոխության համար:

Քահանայական ձեռնադրմամբ արժանացաք աստվածատուր պարգևների՝ անվանակոչվելով Տեր Զգոն: Ի՞նչ խորհուրդ ունի Ձեզ համար Զգոն անունը և արդյոք քահանայագործության այս տարիներին այն էական փոփոխություն ունեցե՞լ է:

Ես միանշանակ համոզված եմ, որ Զգոն անունը Աստծո կամոք է ինձ տրվել: Տերը մեր հոգիների քննողն է և գիտի ում և ինչպիսի շնորհներ պարգևել, որպեսզի կերտվի հոգևորականի անհրաժեշտ պատկերը: Ես կարծում եմ, որ օծյալ հոգևորականի անունը իր մեջ ներառում և արտացոլում է այդ բոլոր փոփոխությունները:

Որպես Աստծո սպասավոր՝ Դուք Աստված-մարդ հարաբերության միջնորդ օղակն եք հանդիսանում: Դժվար չէ արդյո՞ք կամուրջ հանդիսանալ:

Դիտելով հոգևոր սպասավորի մատուցած ծառայությանը հավատացյալ հոտին՝ մեզ հաճախ են ասում, թե որքան դժվար է քահանայագործելը: Սակայն շնորհիվ աստվածային զորավոր ներգործության և աջակցության, ամեն դժվարություն կարողանում ենք հաղթահարել: Հիմնական զորացնող գործոններն են՝ հավատքը, հույսը, սերը, համբերատարությունը և հոգևոր իմաստությունը:

Յուրաքանչյուր մարդ ունի աստվածատուր ազատություն, քրիստոնյայի մեծ ցանկությունն է պահպանել այդ ազատությունը կամ վերագտնել, եթե կորցրել է: Ըստ Ձեզ՝ ո՞րն է հոգու ազատության ճշմարիտ ընկալումը:

Այս վերջին դարերի ընթացքում, հատկապես քրիստոնյա աշխարհում տեսնում ենք որքան է մարդկությունը պայքար մղել ստրկատիրությունից ազատվելու, ձեռք բերելու սոցիալ-տնտեսական, քաղաքական ազատություն, հավասար պայմաններ գործարարության և յուրաքանչյուր մարդու իրավունքների պաշտպանության համար: Սակայն այլ է հոգու ազատությունը, որի արժեքը գերազանցում է բոլոր տեսակի ազատություններին: Այսպիսի ազատությանը կարող է հասնել թե՛ ազատը և թե՛ ստրուկը: Նախևառաջ, քրիստոնեության հիմքում ընկած է մարդու անձնիշխան ընտրությունը բարու և չարի միջև: Միայն այսպիսի ազատության շնորհիվ է հնարավոր հասնել հոգու ազատությանը: Եկեղեցու Սուրբ հայրերն ասում են. «Հոգու ազատությունը մեղքերի ստրկությունից ազատվելն է»: Փորձենք բացել չակերտները և տեսնել դեպի ազատություն տանող ճանապարհը: Աստված Հոգի է, Ում պիտի ձգտենք նմանվել, մոտենալ և հասնել հոգևոր աշխարհին՝ Երկնային Արքայությանը: Իսկ մենք չենք կարող սլանալ դեպի վեր տանող ճանապարհով, եթե ծանրաքաշ երկիրն որոշենք մեր ուսերին բեռնել: Հետևաբար, որպեսզի մեր ընթացքը դեպի հոգու փրկություն և ազատություն դյուրին և հաջող լինի, պիտի կարողանանք ազատագրվել երկրային կապվածություններից՝ ապրելով իբրև պանդուխտ այս աշխարհում:

Ո՞րն է Տեր Զգոն քահանա Աբրահամյանի կյանքի նշանաբանը:

Հոգևոր զգոնությունը կարևոր հատկանիշ է թե՛ հոգևորականի և թե՛ յուրաքանչյուր հավատացյալի համար: Զգոնությունն անհրաժեշտ գործոն է ուղղափառ, ճշմարիտ և նուրբ ուղին զատորոշելու կեղծիքից, մոլորությունից, ծայրահեղություններից: Կարևոր դեր և նշանակություն ունի զգոնությունը քրիստոնյայի փրկության ճանապարհը հաջող անցնելու, մեղքերից խուսափելու, բարին գործելու, երկկողմանի կապն Աստծո հետ ամուր պահելու: Սակայն ինձ համար գլխավոր նշանաբանն է՝ Տիրոջ Սուրբ Խաչը, որն, իր մեջ ներառելով ամեն բան, հանդիսանում է մեր փրկության բանալին:

Տեր Հայր, Ձեր բարեմաղթանքը՝ հավատացյալ հայ ժողովրդին:

Տերն ասում է. «Վերցրու խաչդ և արի Իմ ետևից» (Մատթեոս 16:24): Հավատացյալ հայ ժողովուրդը դարեր շարունակ իր բաժին ընկած ծանր խաչն է կրել և բազում հոգևոր հաղթանակներ տարել՝ հավատարիմ մնալով մեր Տեր Հիսուս Քրիստոսին: Մենք գիտենք Սուրբ Գրքից, որ փորձությունները մարդու կարողությունից ավելին չեն տրվում, ինչը վկայում է մեր ժողովրդի հոգևոր մեծ զորության մասին: Այսօրվա առանձնահատուկ ժամանակաշրջանում մաղթում եմ մեր բոլոր հոգևոր զավակներին ամրանալ հավատքով՝ բարձր պահելով մեր նախնյաց հավատքի դրոշը: Թող Աստված օրհնի բոլորիս՝ սերմանելով մեր սրտերում սեր ու խաղաղություն:

 

Կարինե Սուգիկյան

18.09.15
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․