Վիճել սիրող համառ մարդը

Մեզնից յուրաքանչյուրն իր կյանքում գոնե մեկ անգամ հանդիպել է այնպիսի մարդու, ում համար վեճի ընթացքն ավելի կարևոր է, քան ճշմարտությունը: Նման մարդիկ միշտ և ամենուրեք ամեն առիթով վիճում են: Հենց այդպիսի մի մարդ էր ապրում գյուղերից մեկում: Նա անասելի տաքարյուն և համառ էր, իր պերճախոսությունը ցուցադրելու ոչ մի առիթ բաց չէր թողնում և բոլորի հետ վիճում էր:

Արդարության համար պիտի նշենք, որ նա առաջնակարգ վիճող էր, և կյանքում ոչ մի լեզվակռվում չէր պարտվել: Նա շատ հպարտ էր իր հաղթանակներով և երբ իմացավ, որ մի իմաստուն ծեր է եկել իրենց գյուղ, միանգամից որոշեց վիճաբանության մեջ մտնել նրա հետ և իր համբավն ավելի տարածել:

Նա ծերին ասաց.

- Հարգելի՛ս, ես լսել եմ քո իմաստության մասին, բայց այնուամենայնիվ կարող եմ վիճարկել քո յուրաքանչյուր ասածն ու ապացուցել, որ դու սխալվում ես, իսկ ես ճիշտ եմ:

- Այո՛, դու ճիշտ ես,- խորամանկորեն ժպտաց ծերունին:

- Ո՛չ, ճիշտ չեմ,- իսկույն բացականչեց վեճերի սիրահարն ու… շփոթված լռեց:

Ռուսերենից թարգմանությունը՝ Էմիլիա Ապիցարյանի