Աջակցություն զոհված ազատամարտիկի ընտանիքին

Դեկտեմբերի 7-ին Զորավոր Ս. Աստվածածին եկեղեցում, հոգևոր հովիվ Տեր Գրիգոր քահանա Գրիգորյանը Էրիկ Խաչատրյանին (28 տ.) հանձնեց դրամական օգնություն (100 ԱՄՆ դոլար), որ տրամադրել էր ամերիկաբնակ Կարեն Վարդանյանը: Էրիկը և իր մայրը՝ Խաչատրյան Սվետլանան (52 տ.), բնակվում են Լեռնային Ղարաբաղի Հանրապետության մայրաքաղաք Ստեփանակերտում՝ Տերտերյան 1/6 հասցեում: Էրիկի հայրը՝ Խաչատրյան Վահանը, զոհվել է 1991-1994 թթ. Արցախյան հերոսամարտի ժամանակ: Այժմ Խաչատրյան ընտանիքը դժվարին իրավիճակում է հայտնվել. բացի այն, որ Էրիկի մայրը ոսկրային խնդիր ուներ, երկու շաբաթ առաջ նրա մոտ հայտնաբերել են կրծագեղձի ուռուցք: Էրիկն աշխատում է որպես հսկիչ և իր աշխատավարձով կարողանում է հոգալ միայն ընտանիքի նվազագույն կարիքները:

Էրիկ Խաչատրյանն իր երախտագիտությունը հայտնեց Զորավոր Ս. Աստվածածին եկեղեցու համայնքին և Տեր Գրիգորին, որ իր խնդրանքին ընդառաջ՝ աջակից եղան իր ընտանիքին:

Քրիստոսահիմն եկեղեցին հզոր է և միասնական, երբ նրա մասնիկը կազմող յուրաքանչյուր մի անդամ, իր հոգևոր կյանքից ներս ջանում է իր ապրած ամեն մի օրը լիացնել սիրով, հոգատարությամբ, ջերմությամբ և բարությամբ: Դեպի Աստված տանող ճանապարհին մինչ Կյանքի Դարպասը հասնելը, յուրաքանչյուր ոք «դռներ» ունի բանալու: Երանելի Ս. Օգոստինոսի խոսքով՝ աղքատը քո դուռն է, դու նույնպես աղքատ ես Աստծո Դարպասի առջև: Ինչպես դու կվերաբերվես քեզ խնդրողի հետ, այնպես էլ Աստված կվերաբերվի քեզ հետ:

Սրբի հորդորն է, որ յուրաքանչյուր ոք չանտեսի իր ճանապարհին հանդիպող «դռներին», որպեսզի Աստծո ողորմածությամբ ժամանակին հասնի դեպի Կյանքի Դարպասը և արժանանա Դարպասից ներս մտնելու հավիտենական ուրախությանը:

Կարինե Սուգիկյան