27 Փետրվար, Եշ, Մեծ Պահքի Դ օր

Գրքեր

«Կյանքը մահից հետո» թեմայի շուրջ բանախոսություն-զրույց

Սեպտեմբերի 8-ին՝ Ս. Մարիամ Աստվածածնի ծննդյան օրը, Զորավոր Ս. Աստվածածին եկեղեցում տոնական Ս. Պատարագը մատուցեց Փարիզի Ս. Հովհաննես Մկրտիչ եկեղեցու հոգևոր հովիվ Տեր Հուսիկ քահանա Սարգսյանը: Տեր Հայրը, քարոզին անդրադառնալով տոնի խորհրդին, խոսեց, թե ինչ դեր ունի կինը քրիստոնեության մեջ և մասնավորաբար ասաց. «Ս. Մարիամ Աստվածածինը սրբագործեց իրենից առաջ եղած կանանց թերացումները, քանի որ հնազանդության պտուղը ճաշակելով՝ ընդունեց Հիսուս Քրիստոսի մայրը լինելու բարձր պատիվը: Հնազանդությունն իր մեջ ներառում է բոլոր առաքինությունները, որ կարող ենք գտնել Ս. Մարիամ Աստվածածնի մեջ: Թե՛ տղամարդը և թե՛ կինը հավասար են միմյանց իրենց գործառույթների՝ տեր և հնազանդ լինելու ճիշտ կոչման մեջ: Եթե ամեն կին ձգտի նմանվել Ս. Աստվածածնին, ապա Տիրոջ կողմից նրան կշնորհվի հնազանդության առաքինությունը, եթե ամեն տղամարդ փորձի կնոջ մեջ տեսնել Ս. Աստվածածնին և իր կողակցին վերաբերվի ինչպես Ս. Աստվածածնին կվերաբերվեր, ապա հասարակությունն առողջ կլինի և զերծ կմնա որևէ բևեռացումից»:

Ս. Պատարագի ավարտին Տեր Հուսիկը, «Եկեղեցին մենք ենք» ծրագրի շրջանակներում, հանդիպեց «Զորավոր» երիտասարդաց միության հետ և բանախոսեց «Կյանքը մահից հետո» թեմայի շուրջ: Հանդիպումը սկսվեց «Տերունական աղոթք»-ով, որից հետո երիտասարդաց միության պատասխանատու Տեր Վահան քահանա Առաքելյանը շնորհակալություն հայտնեց Տեր Հորը՝ հրավերն ընդունելու համար:

Տեր Հուսիկը, անդրադառնալով թեմային, Աստվածաշնչից մեջբերեց վախճանաբանության վերաբերյալ հատվածներ և նշեց, որ կրոնական բոլոր ուղղություններն ունեն իրենց դավանական կողմնորոշումը վախճանաբանության վերաբերյալ, բայց բոլորի համար ընդհանուր է այն, որ կյանքը մահով չի ավարտվում, իսկ քրիստոնեական կրոնն ասում է, որ այս կյանքով է որոշվում, թե հանդերձյալ կյանքում մարդը որտեղ կգտնվի: «Դեռևս երրորդ դարից սկսած եկեղեցու հայրերն ասում են, որ մահվանից հետո հոգին քառասուն օրերի ընթացքում մինչ կայան հասնելը անցնում է մի քանի աստիճաններով: Ս. Գրիգոր Լուսավորիչը նշում է այն քսան աստիճանները, որոնք անցնում է հոգին և որի ընթացքում բարի և չար հրեշտակները վիճում են հոգու համար, և եթե հոգին ապաշխարել է իր մեղքերը, ապա կարողանում է այդ աստիճաններն անարգել անցնել: Այդ պատճառով քառասուն օրերի ընթացքում և քառասունքին մենք ննջեցյալների հոգիների հանգստության համար աղոթք ենք անում»,- ասաց Տեր Հուսիկը: Այնուհետև Տեր Հայրը խոսեց ապաշխարության, ընդհանրական հարության և դատաստանի մասին: Ի մի բերելով Հայ եկեղեցու դավանանքը վախճանաբանության վերաբերյալ՝ Տեր Հուսիկն ասաց, որ մահը հոգու բաժանումն է մարմնից, հոգին քառասուն օրեր դեգերում է և պատասխանում դևերի ամբաստանություններին մինչ իր կայան հասնելը, ուր մնալու է մինչև Քրիստոսի երկրորդ գալուստը և ահեղ դատաստանը:

Երիտասարդների համար հետաքրքաշարժ հանդիպումն ավարտվեց վախճանաբանության վերաբերյալ մի շարք հարց ու պատասխաններով:

 

Կարինե Սուգիկյան

08.09.19
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․