19 Նոյեմբեր, Գշ, Հիսնակաց պահքի Բ օր

Գրքեր

Քրիստոնեական կյանքի հիմքը սերն է

Աստծուն հնարավոր է սիրել՝ սիրելով Աստծո պատկերը մարդու մեջ: «Այն մարդը, որ ասում է՝«Ես սիրում եմ Աստծուն», բայց ատում է իր եղբորը, ստախոս է: Ով չի սիրում իր եղբորը, որին տեսնում է, ինչպե՞ս կարող է սիրել Աստծուն, որին չի տեսնում» (Ա Հովհ. 4:20): Քրիստոս, աշխարհ գալով, վերականգնեց անկյալ մարդկային բնությունը՝ Իր օրինակով ուսուցանելով, որ քրիստոնեական կյանքի հիմքը սերն է. «Արդ, եթե Ես Տեր և Վարդապետ եմ, լվացի ձեր ոտքերը, դուք պարտավոր եք միմյանց ոտքերը լվանալ: Ես ձեզ մի օրինակ տվեցի, որպեսզի դուք էլ միմյանց անեք այն, ինչ Ես ձեզ արեցի» (Հովհ. 13:14-16):

Մայիսի 29-ին, Զորավոր Ս. Աստվածածին եկեղեցու և «Արև-երեխաներ» ՀԿ-ի սոցիալական ծրագրերի շրջանակում, հոգևոր հովիվ Տեր Գրիգոր քահանա Գրիգորյանը Պետրոսյան Նաիրային (47տ.) հանձնեց դրամական օգնություն (100 ԱՄՆ դոլար), որ տրամադրել էր ամերիկաբնակ Կարեն Վարդանյանը: Նաիրան Դաունի համախտանիշ ունեցող իր տասնմեկամյա որդու՝ Արմանի հետ բնակվում է Րաֆֆու 111/24ա հանրակացարանում: Երկու սենյականոց բնակարանը, ուր բնակվում է կարիքավոր ընտանիքը, զուրկ է տարրական կենցաղավարության պայմաններից: Ընտանիքի հայրը չորս տարի առաջ լքել է ընտանիքը, և Նաիրան մեծ դժվարությունների ու խնդիրների առջև է կանգնել: «Երեխայիս խնամքով զբաղված լինելով՝ չեմ կարողանում աշխատել, իսկ ընտանեկան նպաստի և տղայիս հաշմանդամության թոշակի գումարները չեն բավարարում, որ հոգամ մեր նվազագույն կարիքները»,- ասաց Նաիրան:

Արև Արմանը սովորում է Երևանի թիվ 12 հատուկ դպրոցում: Նա մեծ ուրախությամբ և ոգևորությամբ է հաճախում «Արև-երեխաներ» ՀԿ-ի Արևի թատրոն: Նաիրան շնորհակալություն հայտնեց «Արև-երեխաներ» ՀԿ-ին և աջակից Վարդանյան ընտանիքին՝ ցուցաբերած աջակցության համար:

Եկեղեցու հայրերից մեկը, առաքինություն ունեցողին համեմատելով առաքինության մասին միայն դատողություն անողի հետ, նշում է, որ վերջինս նման է նրան, ով գովում է մեղրի քաղցրությունը, բայց երբեք չի ճաշակել այն: Սերը մերձավորի հանդեպ ճշմարիտ կյանքի սկիզբն է: Սիրո ձայնը մեծ ուժ ունի, այդ մասին է վկայում հետևյալ պատմությունը: Ս. Հովհաննես առաքյալը Եփեսոսում գտնվելիս դարձի է բերում մի երիտասարդի և մինչ գնալը այնտեղի եկեղեցու քահանային հանձնարարում է հսկել երիտասարդին և նոր կյանքի մեջ հաստատել: Երիտասարդը մի քանի տարի մեծ ջանասիրությամբ ծառայում է Աստծուն և եկեղեցուն, բայց ընկնելով վատ մարդկանց միջավայրը՝ թողնում է բարի ապաստանը և դառնում ավազակապետ: Եփեսոս վերադառնալով՝ Ս. Հովհաննես առաքյալը մեծ ցավով տեղեկանում է պատահածի մասին: Նա, չնայելով իր ծերությանն ու վտանգներին, գնում է երիտասարդին փնտրելու: Երիտասարդը տեսնում է և ճանաչում առաքյալին, բայց խղճի խայթից և ամոթից դրդված՝ փախչում է: Առաքյալի՝ զավա՛կս, կանգ առ խոսքերը ստիպում են նրան զղջալ, վերադառնալ եկեղեցի և նույն առաքինի կյանքին: Առաքյալի զոհաբերող սերը փրկեց երիտասարդի հոգին:

 

Կարինե Սուգիկյան

29.05.19
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․