26 Հունվար, Գշ, Առաջավորաց պահքի Բ օր

Գրքեր

Մահը

Ինչպես վկայում է հռոմեացի պատմագիր Սվետոնիոսը. ՙԿալիգուլա կայսրը իր դեմքը, արդեն ի բնե այլանդակ ու վանող, ջանում էր ավելի կատաղի դարձնել, հայելու առջև վախեցնող ու սարսափեցնող արտահայտություն տալով դրան՚: Եվ ահա կայսրը կանգնում է հայելու առջև և իր դիմագծերին կատաղություն հաղորդում, նախքան իր մոտ շղթայակապ մի քրիստոնյայի բերելը: Երբ զինվորները քրիստոնյային բերում են, հարցնում է.

- Ինչո՞ւ ես այդքան հանդարտ ու հանգիստ, չես տեսնում, թե ի՞նչ ահարկու ու զորեղ եմ: Երկրպագիր ինձ և քեզ կյանք կշնորհեմ: Մի՞թե չես սարսափում մահից:

- Քրիստոս մեզ համար մեռավ և հարություն առավ, որպեսզի Իր գալստյան ժամանակ մենք էլ հարություն առնենք: Եվ Նա է, որ կյանք է շնորհում, ու մենք Աստծուն ենք միայն երկրպագում,-պատասխանում է քրիստոնյան:

Կայսրը իր տեղից վեր է ցատկում ու գոչում.

- Իսկույնևեթ ես մահը կուղարկեմ քեզ մոտ, որպեսզի հասկանաս, թե ով է կյանք ու մահ արժանացնում մարդկանց:

Գիշերվա կեսին սև հանդերձներով մի դև գալիս է ապարանքում թափառող կայսեր մոտ ու ասում.

- Բարև՛ Կալիգուլա, դու ինձ կանչե՞լ էիր:

- Ինչո՞ւ ես այստեղ եկել, գնա զնդան, այնտեղ է քո գործը, ուր մի քրիստոնյա մահվան է դատապարտված,- շփոթահար ու վախվորած պատասխանում է կայսրը:

- Այնտեղ անելու ոչինչ չունեմ. այդ քրիստոնյայի մեջ ինձ վանող այնքան լույս կա... և եթե նա մահանա էլ, Քրիստոսով կյանք կունենա, իսկ քո հոգում այնքան շատ դատարկություն ու խավար կա, որ մահվան բնակության հիանալի մի վայր է,-բերկրանքով ու հիացմունքով ասում է դևը:

Կայսրի դեմքն այլայլվում է, բայց այս անգամ` մահվան երկյուղից...

 

Հովհաննես Մանուկյան

11.04.20
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․