Գրքեր

Սրբին մեծարելը նրան ընդօրինակելն է

- Հա՛յր, ինչ-որ տեղ կարդացել եմ, որ սրբերն իրենց հիշատակության օրը պարգևներ են բաժանում իրենց դիմող մարդկանց: Այդպե՞ս է:

- Այո, հոգևոր քաղցրավենիք են հյուրասիրում: Եթե մեր կյանքով սրբերին ուրախություն ենք պատճառում, ապա նրանք մեզ հոգևոր քաղցրավենիք են հյուրասիրում:

- Իսկ ինչպե՞ս որևէ սրբի սիրեմ, հա՛յր:

- Սրբերից որի՞ն ես ուզում սիրել:

- Սուրբ նախածնողներ Հովակիմին ու Աննային:

- Աղոթիր նրանց ինձ համար, որպեսզի օգնեն ինձ, իսկ ես կաղոթեմ, որպեսզի դու նրանց սիրես: Եթե կարող ես, ապա ամեն օր տվյալ օրվա սրբի վարքը կարդա, որպեսզի բոլոր սրբերի հետ կապ ունենաս: Օրվա սրբի վարքն ընթերցելը և, ընդհանրապես, սրբերի վարքը շատ է օգնում, որովհետև ջերմացնում է հոգին ու մղում՝ նրանց ընդօրինակելու: Այդժամ մարդը մի կողմ է դնում բոլոր վախերն ու փոքրոգությունը և քաջությամբ առաջ է ընթանում: Վարքերն օգնում են հոգու արիություն դաստիարակել, անգամ մինչև նահատակություն:

- Հա՛յր, ինչպե՞ս է պատահում, որ նույնանուն սրբերը նույնատեսակ տանջանքներ են կրում:

- Քո անունն ի՞նչ է:

- Մարիամ:

- Սուրբ Մարիամ կա՞:

- Սուրբ Մարիամ Եգիպտացին:

- Սուրբ Մարիամը նահատակ չէ, բախտդ բերել է: Սակայն նա ճգնում էր, այնպես որ ընդօրինակի՛ր նրա սխրանքին, որպեսզի նույնանման… վարք ունենաք: Սրբերը ջանում էին ընդօրինակել մյուս սրբերին, նրանց, ում մեծարում էին:

- Հա՛յր, իսկ մարդն ինչպե՞ս կարող է որևէ սրբի հետ ընկերանալ:

- Անհրաժեշտ է հարազատանալ սրբին. «Սրբին մեծարելը նրան ընօրինակելն է»,- ասում է սուրբ Բարսեղ Մեծը:

….Վերջերս ծուլացել եմ ու սրբերի ողորմությամբ եմ ապրում, մուրացիկի պես անընդհատ խնդրում եմ նրանցից, և բոլորին էլ խնդրում եմ, որ աղոթեն ինձ համար: Սրբերն իրենց մեծ սիրով ինձ երկնային հացից ու դրախտային մեղրից են տալիս:

 

 

Պաիսիոս Աթոսացի

Ռուսերենից թարգմանեց Էմիլիա Ապիցարյանը

 

06.08.20
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․