13 Օգոստոս, Եշ, Աստվածածնի պահքի Դ օր

Գրքեր

Հաշվապահը

Մի մարդ արագ մտնում է իր երկհարկանի տունը, դուռն ամուր փականներով կողպում, շտապում հյուրասենյակ, հանում մի թավշյա տոպրակ, շուռ տալիս սեղանի վրա, ուր զնգզնգոցով ոսկե դրամներ են լցվում: Մարդն անփութորեն սկսում է դրանք հաշվել, ապա կենտրոնանալով կրկին հաշվում է, հետո նորից դանդաղ հաշվում և ասում.

- Հաշվում եմ, հաշվում եմ, պակաս է... Հնարավոր չէ, որ ես սխալվեմ, բայց Աստված ինչպե՞ս կարող է սխալվել, չէ՞ որ ես երեսունհինգ ոսկի եմ խնդրել, բայց ինձ երեսունչորսն է ուղարկել...

Չէ՞ որ այդ հողը, որ պիտի գնեմ, երեսունհինգ ոսկեդրամ արժե, էլ ինչպե՞ս հող պիտի գնեմ, բարիք ստեղծեմ, մարդկանց էլ այդ բարիքից բաժին հանեմ:

Ինչ-որ մեկը թակում է տան դուռը: Մարդն ուշադրություն չի դարձնում և կրկին սկսում է հաշվել դրամները: Իսկ դուռն անընդհատ թակում են: Այդ ամենից զայրացած մարդը երկրորդ հարկի պատուհանից զգուշավորությամբ նայում է և ներքևում տեսնում դռան մոտ կանգնած մի ծերունու:

- Այդպես էլ գիտեի, որ Աստված հիմա էլ մի կարիքավոր մարդու է այստեղ բերել, որպեսզի Իր նվիրած դրամներով ողորմություն անեմ: Բավական չէ, որ մեկ ոսկեդրամ պակաս է ուղարկել, հիմա էլ մի ծերուկ է ուղարկել, որ նրան ողորմություն տամ,- ասում է մարդը:

Այնուհետև բացում է պատուհանն ու շարունակում.

- Չե՛մ տա, թեկուզ մեկ հատ էլ չե՛մ տա: Աստված անարդար է իմ հանդեպ:

Ծերունին զարմացած հայացքը հառում է դեպի վեր և պատասխանում.

- Ինձ ապրելու կարճ ժամանակ է մնացել և իմ փոքրիկ ժառանգությունը, որ մեկ ոսկեդրամ է, որոշեցի փոխանցել որևէ մարդու: Աստված էլ ինձ բերեց այստեղ, իսկ դու Նրան մեղադրում ես` ինչ-որ հաշվապահությամբ զբաղվելով...

 

Հովհաննես Մանուկյան

09.05.20
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․