Քահանաներ Ծխական խորհուրդ Տիկնանց միություն Երիտասարդաց միություն Ցերեկային կենտրոն 
Քրիստոնյա ընտանիք Հարցազրույցներ Ուխտագնացություն Սոցիալական ծառայություն
Զորավոր Ս. Աստվածածին եկեղեցու բակում անցկացվեց «Զատկական փառատոն»
Մարտի 31-ին Հայ եկեղեցին նշեց Տիրոջ հրաշափառ Հարության տոնը, ինչի առթիվ Հայաստանյայց բոլոր եկեղեցիներում մատուցվեց տոնական Սուրբ Պատարագ: Զորավոր Ս. Աստվածածին եկեղեցում Սուրբ Պատարագի ավարտին, ԱՀԹ առաջնորդական փոխանորդ Գերաշնորհ Տեր Նավասարդ արք. Կճոյանի օրհնությամբ և ՀՀ ԿԳՄՍ նախարարության աջակցությամբ, «Երեխաների հատուկ ստեղծագործական կենտրոն» ՊՈԱԿ-ը եկեղեցու բակում անցկացրեց «Զատկական փառատոն»։ Արդեն երրորդ տարին է, որ մշակութային այս կարևոր իրադարձությունը հնարավորություն է տալիս կրթության առանձնահատուկ պայմանների կարիք ունեցող երեխաներին ցուցադրել իրենց ձեռքի աշխատանքներն ու հանդես գալ երաժշտական և պարային կատարումներով։ Փառատոնի ընթացքում երեխաները հնարավորություն ունեցան մասնակցելու վարպետության դասերին և պատրաստելու օրվա խորհրդանիշ ձեռքի աշխատանքներ:
Փառատոնին իրենց մասնակցություն էին բերել նաև այլ մասնագիտացված կառույցների անդամներ: «Զատկական փառատոն»-ը երեխաներին զատկական տոնախմբություն պարգևելուց զատ հնարավորություն տվեց բացահայտելու իրենց կարողությունները, գտնելու նոր ընկերներ և նպաստելու ազգային, համամարդկային արժեքների ոգով դաստիարակված անձի ու քաղաքացու ձևավորմանը։
Կարինե Սուգիկյան
